അദ്ദിക്ർ

പശുവിനെ ഉണ്ടാക്കുന്നതിന് നേതൃത്വം വഹിച്ച കപടവിശ്വാസിയായ 'സാമിരി'യോട് 'എന്നെ നമ്പരുത്' (എന്നെ വിശ്വസിക്കരുത്) എന്ന് ആവര്‍ത്തിച്ചാവര്‍ത്തിച്ച് പറഞ്ഞു കൊണ്ട് സ്ഥലം വിടാന്‍ മൂസാ കല്‍പ്പിക്കുകയും, പശുവിനെ കരിച്ച് നദിയിലൊഴുക്കുകയും ചെയ്തു. പശുവിനെ ഉണ്ടാക്കാന്‍ കൂട്ടുനിന്ന ഇസ്റാഈല്‍ സന്തതികള്‍ പരസ്പരം വധിക്കണമെന്ന അല്ലാഹുവിന്‍റെ കല്‍പന പ്രവാചകന്‍ മൂസാ അറിയിച്ചതനുസരിച്ച് നിയന്ത്രണമില്ലാതെ വധം നടക്കുകയും അങ്ങിനെ നിരപരാധികളടക്കം എഴുപതിനായിരം പേര്‍ പരസ്പരം വധിക്കപ്പെടുകയും ചെയ്തു. അതില്‍ വധിക്കപ്പെട്ട നിഷ്കളങ്കരായ ആളുകള്‍ക്ക് അല്ലാഹുവിന്‍റെ മാര്‍ഗത്തില്‍ രക്തസാക്ഷിത്വം വഹിച്ചവരുടെ പ്രതിഫലമുണ്ടെന്ന് പ്രപഞ്ചനാഥന്‍ അവന്‍റെ പ്രവാചകനിലൂടെ പഠിപ്പിച്ചിട്ടുണ്ട്. 20: 95-98 വിശദീകരണം നോക്കുക.

59: 24 ല്‍ വിശദീകരിച്ച പ്രകാരം, ആത്മാവിനെ സൃഷ്ടിച്ചവന് സ്രഷ്ടാവ് -ഖാലിഖ്- എന്നും ശരീരം സൃഷ്ടിച്ചവന് പടച്ചവന്‍ -ബാരിഅ്- എന്നും ആത്മാവും ശരീരവും സന്തുലനപ്പെടുത്തിയവന് രൂപപ്പെടുത്തിയവന്‍ -മുസ്വവ്വിര്‍- എന്നും പറയുന്നു. അറിഞ്ഞിട്ട് കുറ്റം ചെയ്യുന്നവര്‍ക്ക് മാപ്പില്ലെന്നും അവരോടാണ് അല്ലാഹു പ്രതികാരം ചെയ്യുക എന്നും ഈ സംഭവങ്ങളില്‍ നിന്നെല്ലാം മനസ്സിലാക്കാം. അവന്‍റെ പ്രതിനിധികളായ വിശ്വാസികള്‍ക്ക് അറിഞ്ഞിട്ട് മൂടിവെക്കുന്ന കപടവിശ്വാസികളോട് മാത്രമാണ് പ്രതികാര മനോഭാവമുണ്ടാവുക. ഒരു കുറ്റം കണ്ടാല്‍ കൈ കൊണ്ട് തടയണം, അതിന് സാധ്യമല്ലെങ്കില്‍ നാവുകൊണ്ട് തടയണം, അതിനും സാധ്യമല്ലെങ്കില്‍ മനസ്സുകൊണ്ട് വെറുക്കുകയെങ്കിലും വേണമെന്നും, മനസ്സുകൊണ്ട് വെറുത്തിട്ടില്ലെങ്കില്‍ പിന്നെ അവനില്‍ വിശ്വാസത്തിന്‍റെ അംശം പോലും ഉണ്ടായിരിക്കുകയില്ല എന്നും പ്രപഞ്ചനാഥന്‍ അവന്‍റെ പ്രവാചകനിലൂടെ പഠിപ്പിച്ചിട്ടുണ്ട്. 2: 18, 186; 3: 183; 7: 205-206 വിശദീകരണം നോക്കുക.